குஜராத் மாநிலம் தாஹோத் மாவட்டத்தில் உள்ள தன்பூர் வனப்பகுதியில் இரண்டு தலைகள் மற்றும் நான்கு கண்களுடன் காணப்பட்ட அரிய வகை பாம்பு ஒன்று பத்திரமாக மீட்கப்பட்டுள்ளது. இந்த பாம்பை பார்த்த பொதுமக்கள் ஆச்சரியமடைந்த நிலையில், தகவல் கிடைத்ததும் வனவிலங்கு மீட்புக் குழுவினர் சம்பவ இடத்திற்கு சென்று பாம்பை பாதுகாப்பாக மீட்டனர்.மீட்கப்பட்ட பாம்பு ‘வுல்ஃப் ஸ்னேக்’ (Wolf Snake) எனப்படும் நச்சுத்தன்மையற்ற சிறிய பாம்பு வகையைச் சேர்ந்தது என தெரிவிக்கப்பட்டுள்ளது. பொதுவாக இந்த வகை பாம்புகள் மனிதர்களுக்கு பெரிய ஆபத்தை ஏற்படுத்தாது. இரவு நேரங்களில் அதிகம் செயல்படும் இவை, சிறிய உயிரினங்களை உணவாகக் கொண்டு வாழ்கின்றன.
எப்படி இரண்டு தலைகள் உருவாகும்?
இரண்டு தலைகளுடன் பிறக்கும் பாம்புகள் மிகவும் அரிதானவை. இதற்கு ‘பைசெபலி’ (Bicephaly) எனப்படும் பிறவியிலேயே ஏற்படும் வளர்ச்சி மாற்றம் காரணமாக இருக்கலாம். கருவாக உருவாகும் போது உடல் முழுமையாகப் பிரியாமல் இருப்பதால், ஒரே உடலில் இரண்டு தலைகள் உருவாகும்.இத்தகைய பாம்புகளுக்கு பொதுவாக இரண்டு தலைகளும் தனித்தனியாக செயல்படக்கூடும். இதனால் உணவு தேடுவது, நகர்வது போன்ற செயல்களில் சிரமம் ஏற்பட வாய்ப்பு உள்ளது. இயற்கையில் இவை உயிர்வாழ்வது மிகவும் சவாலானதாக இருப்பதாக வனவிலங்கு நிபுணர்கள் தெரிவிக்கின்றனர்.தன்பூர் வனப்பகுதியில் மீட்கப்பட்ட இந்த அரிய பாம்பு தற்போது பாதுகாப்பாக வைக்கப்பட்டு, அதன் உடல்நிலை மற்றும் இயல்பான செயல்பாடுகள் குறித்து கண்காணிக்கப்பட்டு வருவதாக தெரிவிக்கப்பட்டுள்ளது.
