அமெரிக்காவில் மனிதர்களைப் போலவே தோற்றம் மற்றும் செயல்பாடுகளைக் கொண்ட ஹியூமனாய்டு ரோபோக்களின் உற்பத்தி வேகமாக அதிகரிக்க உள்ளதாக ஜே.பி. மோர்கன் நிறுவனம் கணித்துள்ளது. இதன்படி, 2030ஆம் ஆண்டுக்குள் ஆண்டுக்கு சுமார் 3 லட்சம் முதல் 4 லட்சம் மனித உருவ ரோபோக்கள் தயாரிக்கப்படலாம் எனத் தெரிவிக்கப்பட்டுள்ளது. மேலும், 2035ஆம் ஆண்டுக்குள் இந்த எண்ணிக்கை ஆண்டுக்கு 15 லட்சமாக அதிகரிக்க வாய்ப்புள்ளதாகவும் கணிக்கப்பட்டுள்ளது.தற்போது பல்வேறு நிறுவனங்கள் தொழிற்சாலைகள், பொருட்களைச் சேமிக்கும் கிடங்குகள் மற்றும் உற்பத்தி மையங்களில் இந்த ரோபோக்களைப் பயன்படுத்துவதில் அதிக ஆர்வம் காட்டி வருகின்றன. பொருட்களைத் தூக்குவது, ஒரு இடத்திலிருந்து மற்றொரு இடத்திற்குக் கொண்டு செல்வது, இயந்திரங்களை இயக்குவது போன்ற வேலைகளை இந்த ரோபோக்களால் செய்ய முடியும்.குறிப்பாக, செயற்கை நுண்ணறிவு (AI), சென்சார்கள் மற்றும் நவீன கணினித் தொழில்நுட்பங்களின் உதவியுடன் மனிதர்களைப் போலவே சுற்றுப்புறத்தைப் புரிந்துகொண்டு செயல்படும் திறன் இந்த ரோபோக்களுக்கு அதிகரித்து வருகிறது.ஏற்கனவே டெஸ்லா உள்ளிட்ட பல தொழில்நுட்ப நிறுவனங்கள் மனித உருவ ரோபோக்களை உருவாக்கி வருகின்றன. எதிர்காலத்தில் வீட்டு வேலைகள், மருத்துவமனைகள், முதியோர் பராமரிப்பு மற்றும் ஆபத்தான தொழிற்சாலைப் பணிகளிலும் இவற்றைப் பயன்படுத்த வாய்ப்புள்ளது.இதனால் உற்பத்தித் திறன் அதிகரிப்பதுடன், பல வேலைகள் விரைவாக முடிக்கப்படலாம். அதே நேரத்தில், மனிதர்களின் வேலைவாய்ப்புகள் குறையுமா அல்லது புதிய வேலைவாய்ப்புகள் உருவாகுமா என்ற கேள்வியும் எழுந்துள்ளது. ரோபோக்களை உருவாக்குதல், பராமரித்தல் மற்றும் இயக்குதல் போன்ற துறைகளில் புதிய வேலைவாய்ப்புகள் உருவாகவும் வாய்ப்புள்ளது.
