ரஷ்யா – உக்ரைன் போரை முடிவுக்குக் கொண்டுவரும் நோக்கில், அமெரிக்கா, ரஷ்யா மற்றும் உக்ரைன் நாடுகளுக்கு இடையே ஐக்கிய அரபு அமீரகத்தின் அபுதாபியில் புதிய அமைதிப் பேச்சுவார்த்தை தொடங்கியுள்ளது.அமெரிக்காவின் மத்தியஸ்தத்தில் நடைபெறும் இந்தப் பேச்சுவார்த்தையில் அமெரிக்கா சார்பில் சிறப்புத் தூதர் ஸ்டீவ் விட்காஃப் மற்றும் ஜாரெட் குஷ்னர் ஆகியோர் பங்கேற்றுள்ளனர். உக்ரைன் மற்றும் ரஷ்யா நாடுகளின் உயர்மட்டப் பிரதிநிதிகளும் கலந்து கொண்டுள்ளனர்.இந்தப் பேச்சுவார்த்தையின் முதல் நாள் கூட்டம் சுமார் நான்கு மணி நேரம் நடைபெற்றுள்ளது. தொடர்ந்து புதன்கிழமையும் பேச்சுவார்த்தை நடைபெற உள்ளது.உக்ரைனின் பாதுகாப்பு, போரை நிறுத்துவதற்கான வழிகள், போருக்குப் பிறகு வழங்கப்பட வேண்டிய பாதுகாப்பு உத்தரவாதங்கள் மற்றும் ஐரோப்பாவின் எதிர்கால பாதுகாப்பு ஆகியவை முக்கியமாக விவாதிக்கப்படுகின்றன.
கடந்த 2022ஆம் ஆண்டு பிப்ரவரி மாதம் ரஷ்யா உக்ரைன் மீது முழு அளவிலான ராணுவத் தாக்குதலைத் தொடங்கியது. இதனால் ஆயிரக்கணக்கான மக்கள் உயிரிழந்ததுடன், லட்சக்கணக்கானோர் தங்கள் வீடுகளை விட்டு வெளியேறினர். இந்தப் போர் உலகப் பொருளாதாரம், எரிசக்தி விநியோகம் மற்றும் உணவுப் பொருட்களின் விலையிலும் தாக்கத்தை ஏற்படுத்தியது.உக்ரைனின் சில பகுதிகளைத் தன்னுடன் இணைத்துக்கொண்ட ரஷ்யா, அந்தப் பகுதிகள் தொடர்பாக தனது நிலைப்பாட்டில் உறுதியாக உள்ளது. ஆனால், உக்ரைன் தனது நிலப்பரப்பை விட்டுக்கொடுக்க முடியாது என்றும், நாட்டின் பாதுகாப்புக்கு உத்தரவாதம் தேவை என்றும் வலியுறுத்தி வருகிறது.இதனால் இரு நாடுகளுக்கும் இடையே முக்கியமான கருத்து வேறுபாடுகள் தொடர்ந்து நீடிக்கின்றன.இந்தப் பேச்சுவார்த்தை மூலம் போரை முடிவுக்குக் கொண்டுவருவதற்கான தீர்வு கிடைக்குமா என்ற எதிர்பார்ப்பு உலக நாடுகளிடையே ஏற்பட்டுள்ளது.
