16-வது தமிழக சட்டபேரவை தொடங்கியது. முதல்வர் மு.க.ஸ்டாலின், புதிதாக தேர்ந்தெடுக்கப்பட்ட எம்.எல்.ஏ.க்கள் பதவியேற்றனர்.
புதன்கிழமை தேர்ந்தெடுக்கப்பட்ட 234 உறுப்பினர்களில் மொத்தம் 223 பேர் 16 வது தமிழக சட்டப்பேரவையின் சட்டமன்ற உறுப்பினர்களாக இன்று (11.05.2021-செவ்வாய்க்கிழமை) சென்னை வாலஜா சாலையில் உள்ள கலைவானர் அரங்கத்தில் பதவியேற்றனர்.
சபையின் அனைத்து உறுப்பினர்களும், சட்டமன்ற அதிகாரிகளும், சபையில் இருந்த நிருபர்களும் முகமூடிகளை அணிந்திருந்தனர். கொரோனா வைரஸ் பரவுவதற்கு எதிராக முன்னெச்சரிக்கை நடவடிக்கைகளை மேற்கொண்டிருந்தனர்.
சுற்றுலாத்துறை அமைச்சர் எம்.மதிவேந்தன், பிற்படுத்தப்பட்டோர் நலத்துறை அமைச்சர் எஸ்.எஸ்.சிவசங்கர் உட்பட பத்து உறுப்பினர்கள் தனிப்பட்ட மற்றும் உடல்நிலை காரணங்களால் இன்று உறுதிமொழி எடுக்கவில்லை.
முதல் முறையாக எம்.எல்.ஏ. வாக தேர்ந்தெடுக்கப்பட்டுள்ள புதுமுகங்கள் முதல்வர் மு.க.ஸ்டாலின் அவர்களின் மகன் உதயநிதி ஸ்டாலின், காங்கிரஸ் பாராளுமன்ற உறுப்பினர் திருநாவுக்கரசர் அவர்களின் மகன் டி.ராமச்சந்திரன் மற்றும் காங்கிரஸ் தலைவர் ஈ.வி.கே.எஸ். இளங்கோவன் அவர்களின் மகன் திருமகன் ஈவெரா ஆகியோர் தங்களது உறுதிமொழியை உளமாற ஏற்றுக்கொண்டனர். வாரிசு அரசியலுக்கு முடிவு காலம் தமிழகத்தில் கிடையாது என்று பலராலும் விமர்சிக்கப்படும் நிலையில் இவர்கள் தங்கள் தொகுதியின் முன்னேற்றத்திற்குப் பாடுபட்டு மக்களின் வளர்ச்சிக்காக பங்காற்றுவார்களா என்பதை பொறுத்திருந்து பார்ப்போம்.
16-வது தமிழக சட்டப்பேரவையின் முதல் கூட்டத்தைத் தற்காலிக சார்பு சபாநாயகர் கே.பிச்சாண்டி அவர்கள் ஆரம்பித்தவுடன், முதல்வர் எம்.கே.ஸ்டாலின், பிற அமைச்சர்கள், எதிர்க்கட்சித் தலைவர் எடப்பாடி கே.பழனிசாமி, முன்னாள் சபாநாயகர் பி.தனபால், முன்னாள் துணை சபாநாயகர் பொள்ளாச்சி வி.ஜெயராமன் மற்றும் இதர சபையின் உறுப்பினர்கள் தத்தமது தேர்தல் வெற்றி சான்றிதழைச் சமர்ப்பித்துப் பதவி பிரமாணம் எடுத்துக் கொண்டனர்.
முதல்வர் ஸ்டாலின், அவரது அமைச்சரவை சகாக்கள் மற்றும் திமுக எம்.எல்.ஏக்கள் உளமாற உறுதிமொழி அளித்தபோது, எதிர்க்கட்சி எடப்பாடி பழனிசாமி மற்றும் முன்னாள் துணை முதல்வர் ஓ பன்னீர்செல்வம் உள்ளிட்ட பெரும்பாலான அதிமுக உறுப்பினர்கள் கடவுளின் பெயரால் சத்தியம் செய்தனர். சட்டமன்றத் தேர்தலில் வெற்றி பெற்றதைத் தொடர்ந்து தனது மாநிலங்களவை உறுப்பினர் பதவியை ராஜினாமா செய்த அதிமுகவின் கே.பி.முனுசாமி உள்ளிட்ட சில உறுப்பினர்கள் தங்கள் மனசாட்சியின் பெயரில் உறுதிமொழி அளித்தனர்.
-பிரியங்கா மோகனவேல்
