தீபாவளி பண்டிகை இறைச்சிக்காக 4 கோடி மதிப்பிலான ஆடுகள் விற்பனை – விவசாயிகள் மகிழ்ச்சி

ஆரோக்கியம் சமையல் செய்திகள் தமிழ்நாடு நிகழ்வுகள் வரும் நிகழ்ச்சிகள் விவசாயம்

தீபாவளி பண்டிகையை முன்னிட்டு நெல்லை மேலப்பாளையம் கால்நடை சந்தையில் ஒரே நாளில் 4 கோடி ரூபாய்க்கு ஆடுகள் விற்பனை.
நெல்லை மாநகர பகுதியில் உள்ள மேலப்பாளையம் கால்நடை சந்தை மாவட்டத்தின் புகழ்பெற்ற சந்தையாகும். வாரந்தோறும் செவ்வாய்க்கிழமை மட்டும் இந்த சந்தை நடைபெறும். இங்கு நெல்லை மட்டுமல்லாமல் தென்காசி, தூத்துக்குடி, விருதுநகர் போன்ற அண்டை மாவட்டங்களை சேர்ந்த விவசாயிகளும் தங்களுடைய ஆடுகளை இங்கு கொண்டு வந்து விற்பனை செய்வார்கள்.
இந்த நிலையில் தீபாவளி பண்டிகையை முன்னிட்டு மேலப்பாளையம் சந்தையில் இன்று கூட்டம் அலைமோதுகிறது. தீபாவளி பண்டிகை வரும் 24ம் தேதி கொண்டாடப்பட இருக்கும் நிலையில் அன்றைய தினம் பொதுமக்கள் பட்டாசுகள் வெடித்தும் புத்தாடைகள் உடுத்தியும் அசைவ உணவுகள் சமைத்து உற்சாகமாக பண்டிகையை கொண்டாடுவார்கள். எனவே இன்று மேலப்பாளையம் கால்நடை சந்தையில் ஆடுகள் விற்பனை சூடு பிடித்துள்ளது.
சிறிய குட்டி ஆடு 3000 ரூபாய் முதல் பெரிய ஆடு 45 ஆயிரம் ரூபாய் வரை விற்பனை செய்யப்படுகிறது. ஆயிரக்கணக்கான பொதுமக்கள் மற்றும் இறைச்சி கடை வியாபாரிகள் இன்று காலையிலிருந்து இந்த கால்நடை சந்தையில் குவிந்துள்ளனர். அவர்கள் தங்களுக்கு தேவையான ஆடுகளை தேர்வு செய்து வாங்கி வருகிறார்கள். இன்று ஒரே நாளில் மட்டும் சுமார் 4 கோடி ரூபாய்க்கு இங்கு விற்பனை நடந்துள்ளதாக கூறப்படுகிறது.
இதுகுறித்து ஆடுகளை விற்பனை செய்ய வந்த விவசாயிகள் பேசியபோது, “இந்த ஆண்டு அதிகமான ஆடுகள் விற்பனைக்கு வந்துள்ளதால் ஆடுகளை மிக குறைந்த விலைக்கு இறைச்சி கடைக்காரர்கள் கேட்கிறார்கள். நாங்கள் காலையிலேயே இங்கு வந்து விட்டோம். இதுவரை ஆடுகள் விற்பனை செய்யாமல் இங்கே நிற்கிறோம்” என தெரிவித்தனர்.
ஆடுகளை வாங்க வந்தவர்களிடம் பேசியபோது, “இந்த ஆண்டு ஆடு விற்பனை அமோகமாக உள்ளது. சிறிய ஆட்டுக்குட்டி 3000 ரூபாய் முதல் பெரிய ஆடு 45 ஆயிரம் ரூபாய் வரை விற்பனை செய்யப்படுகிறது” என தெரிவித்தனர். இதேபோல் மேலப்பாளையத்தில் பல்வேறு பகுதிகளிலும் நாட்டுக்கோழி, வாத்து உள்ளிட்ட விற்பனையும் அமோகமாக நடந்து வருகிறது.

Leave a Reply

Your email address will not be published.