இந்திய விண்வெளி ஆராய்ச்சி நிறுவனமான இஸ்ரோ, இந்தியாவின் உள்நாட்டு வழிகாட்டி அமைப்பான நாவிக் (NavIC) தொழில்நுட்பத்தை வலுப்படுத்தும் வகையில், NVS-03 செயற்கைக்கோளை வரும் அக்டோபர் 30, 2026 அன்று விண்ணில் செலுத்தத் திட்டமிட்டுள்ளது. ஆந்திரப் பிரதேச மாநிலம் ஸ்ரீஹரிகோட்டாவில் உள்ள சதீஷ் தவான் விண்வெளி மையத்திலிருந்து, GSLV மார்க் II ராக்கெட் மூலம் இந்தச் செயற்கைக்கோள் ஏவப்பட உள்ளது. முன்னதாக அக்டோபர் 15 முதல் 20ஆம் தேதிக்குள் ஏவத் திட்டமிடப்பட்டிருந்த நிலையில், பின்னர் அக்டோபர் 30ஆம் தேதிக்கு மாற்றப்பட்டுள்ளது.இந்தச் செயற்கைக்கோள் வெற்றிகரமாகச் செயல்படத் தொடங்கினால், இந்தியாவின் நாவிக் வழிகாட்டி அமைப்பை மேம்படுத்த உதவும். இதன் மூலம் வாகனங்களின் இருப்பிடத்தைக் கண்டறிதல், கடல் வழிப் போக்குவரத்து, ரயில்களின் கண்காணிப்பு, ராணுவப் பயன்பாடுகள் மற்றும் பொதுமக்களுக்கான வழிகாட்டிச் சேவைகள் போன்றவற்றின் நம்பகத்தன்மையை அதிகரிக்க முடியும். மேலும், அமெரிக்காவின் GPS போன்ற வெளிநாட்டு அமைப்புகளை மட்டுமே சார்ந்திருக்காமல், இந்தியாவின் சொந்த செயற்கைக்கோள் வழிகாட்டித் தொழில்நுட்பத்தை வலுப்படுத்துவதிலும் இந்தத் திட்டம் முக்கியப் பங்கு வகிக்கிறது. எனவே, NVS-03 செயற்கைக்கோளின் ஏவுதல் இந்தியாவின் விண்வெளி மற்றும் தொழில்நுட்ப வளர்ச்சியில் முக்கியமான மைல்கல்லாக எதிர்பார்க்கப்படுகிறது.
