இஸ்ரோ 2026 ஆம் ஆண்டின் முதல் விண்வெளி பயணமாக PSLV-C62 ராக்கெட்டை ஸ்ரீஹரிகோட்டாவில் உள்ள சதீஷ் தவான் விண்வெளி மையத்திலிருந்து காலை 10:17 மணிக்கு வெற்றிகரமாக ஏவியது. இந்த பயணம் மிகுந்த எதிர்பார்ப்புகளுடன் தொடங்கப்பட்டது.இந்த ராக்கெட்டில் இந்தியாவின் பாதுகாப்பு மற்றும் தேசிய பாதுகாப்பு தேவைகளுக்காக DRDO உருவாக்கிய EOS-N1 செயற்கைக்கோள் கொண்டு செல்லப்பட்டது. இதன் கூடுதலாக, ஸ்பெயினிலிருந்து ஒரு சிறிய செயற்கைக்கோளும், இந்தியா, மொரிஷியஸ், லக்சம்பர்க், ஐக்கிய அரபு அமீரகம், சிங்கப்பூர், ஐரோப்பா மற்றும் அமெரிக்கா ஆகிய நாடுகளைச் சேர்ந்த ஸ்டார்ட்அப் நிறுவனங்கள் மற்றும் ஆராய்ச்சி நிறுவனங்கள் உருவாக்கிய 16 சிறிய செயற்கைக்கோள்களும் இதில் இடம்பெற்றன.PSLV-C62 ராக்கெட் பூமியிலிருந்து சுமார் 511 கிலோமீட்டர் உயரத்தில் உள்ள சூரிய ஒத்திசைவு சுற்றுப்பாதையில் (Sun-Synchronous Orbit) இந்த செயற்கைக்கோள்களை நிலைநிறுத்த திட்டமிடப்பட்டது. இந்த ராக்கெட்டில் மொத்தம் நான்கு நிலைகள் இருந்தன. அதில் இரண்டு திட எரிபொருள் நிலைகளும், இரண்டு திரவ எரிபொருள் நிலைகளும் அடங்கும்.பயணத்தின் ஆரம்ப கட்டத்தில் எல்லாம் சீராக நடந்தது. முதல் இரண்டு நிலைகளும் வெற்றிகரமாக செயல்பட்டன. ஆனால் மூன்றாம் நிலையில் எதிர்பாராத அதிர்வுகள் கண்டறியப்பட்டன. இந்த தொழில்நுட்ப கோளாறு காரணமாக ராக்கெட் தனது திட்டமிட்ட பாதையிலிருந்து விலகி, இலக்கு சுற்றுப்பாதையை அடைய முடியவில்லை.இதுகுறித்து இஸ்ரோ தலைவர் வி. நாராயணன் கூறுகையில், இந்த பயணம் திட்டமிட்டபடி முழுமையடையவில்லை என்றார். மேலும், பல தரை நிலையங்களிலிருந்து கிடைத்த தகவல்களை விஞ்ஞானிகள் கவனமாக ஆய்வு செய்து வருவதாகவும், கோளாறின் காரணத்தை கண்டறிய விரிவான விசாரணை நடைபெற்று வருவதாகவும் தெரிவித்தார். ராக்கெட் மற்றும் செயற்கைக்கோள்களின் நிலை குறித்து ஆய்வு தொடர்ந்து நடைபெறுகிறது.
