கத்தார் மன்னர் ஷேக் தமீம் பின் ஹமாத் அல்-தானி நாளை இந்தியா வருவதாக தகவல்கள் வெளியாகியுள்ளன. பிரதமர் மோடியின் அழைப்பை ஏற்று அவர் இரண்டு நாட்கள் இந்தியாவில் அரசியல் பயணம் மேற்கொள்கிறார். கத்தார் மன்னருடன், அமைச்சர்கள், மூத்த அதிகாரிகள் மற்றும் வணிகக் குழு ஆகியோர் உடன் வருவதாக இந்திய வெளியுறவு அமைச்சகம் அறிவித்துள்ளது. கத்தார் மன்னருக்கு 18ம் தேதி ஜனாதிபதி மாளிகையில் பாரம்பரிய வரவேற்பு வழங்கப்படும், மேலும் அவர் ஜனாதிபதி திரவுபதி முர்முவுடன் உரையாடுவார். பின்னர், கத்தார் மன்னர் மற்றும் பிரதமர் மோடி இருதரப்பு நாட்டின் உறவுகளின் பல்வேறு அம்சங்களைப் பற்றி விவாதிக்கவுள்ளனர்.இந்தியாவும் கத்தாரும் நட்பு, நம்பிக்கை மற்றும் பரஸ்பர மரியாதை ஆகியவற்றின் அடிப்படையில் ஆழமான வரலாற்று உறவுகளை தொடர்ந்தும் வளர்த்துக் கொண்டிருக்கின்றன. இரு நாடுகளுக்கிடையிலான உறவுகள் மேலும் வலுப்பெற்று வருகின்றன. கத்தார் மன்னர் ஷேக் தமீம் பின் ஹமாத் அல்-தானி, இந்தியாவுக்கு 2வது முறையாக வருகை தருகிறார்; இதற்கு முன்பு 2015ம் ஆண்டு மார்ச் மாதத்தில் இந்தியாவுக்கு வந்துள்ளார் என்பது குறிப்பிடத்தக்கது.
