கரூர் செல்கிறார் தமிழக முதல்வர் விஜய்; கரூர் சம்பவத்தில் உயிரிழந்தோர் குடும்பத்தினருக்கு வேலை வழங்கும் நிகழ்வில் பங்கேற்கிறார்

நாளை கரூர் செல்லும் முதலமைச்சர் விஜய், ரூ.1,700 கோடி தொழிற்சாலைக்கு அடிக்கல் நாட்டி, பாதிக்கப்பட்ட 32 பேருக்கு அரசுப் பணி ஆணைகளை வழங்குகிறார்.
தமிழக முதலமைச்சர் ஜோசப் விஜய் நாளை (ஜூலை 10, 2026) கரூர் மாவட்டத்திற்கு தனது முதல் அதிகாரப்பூர்வ மெகா அரசு முறைப் பயணத்தை மேற்கொள்ள உள்ளார். இந்த அதிரடிப் பயணத்தின் போது கரூரில் ரூ.1,700 கோடி மதிப்பீட்டிலான பிரம்மாண்ட தனியார் தொழில் திட்டங்களுக்கு அடிக்கல் நாட்டுவதுடன், சமீபத்திய விபத்தில் உயிரிழந்தவர்களின் குடும்பத்தினருக்குக் கருணை அடிப்படையில் அரசுப் பணி நியமன ஆணைகளையும் வழங்குகிறார்.
முதலமைச்சர் விஜய்யின் இந்த கரூர் பயணத்தின் மிக முக்கியமான பொருளாதார நகர்வாக, கரூர் அருகே உள்ள மனவாசி பகுதியில் சுமார் ரூ.1,700 கோடி முதலீட்டில் அமையவுள்ள புதிய உள்கட்டமைப்புத் தொழிற்சாலைக்கு அடிக்கல் நாட்டுகிறார்.தோல் அல்லாத (Non-Leather) காலணிகளை சர்வதேசத் தரத்தில் உற்பத்தி செய்யும் இந்த நவீனத் தனியார் தொழிற்சாலையின் மூலம் கரூர் மற்றும் அதன் சுற்றுவட்டார மாவட்டங்களைச் சேர்ந்த சுமார் 13,500 பேருக்குப் புதிய வேலைவாய்ப்புகள் நேரடியாகவும் மறைமுகமாகவும் கிடைக்கப் பெறவுள்ளது. குறிப்பாக, டெக்ஸ்டைல் மற்றும் பஸ் பாடி பில்டிங் தொழிலுக்குப் பெயர் போன கரூரில், இந்த மெகா காலணி தொழிற்சாலை புதிய திருப்புமுனையாக அமையும் எனப் பொருளாதார வல்லுநர்கள் கருதுகின்றனர்.
பொதுமக்கள் மற்றும் தொண்டர்களைச் சந்திக்கும் வகையில் கரூரில் நாளை சுமார் 10 கிலோ மீட்டர் தூரத்திற்கு முதலமைச்சர் விஜய் திறந்த வாகனத்தில் பிரம்மாண்ட ‘ரோடுஷோ’ (Roadshow) செல்லத் திட்டமிட்டுள்ளார்.
திருச்சி மத்திய மண்டல ஐஜி மற்றும் கரூர் மாவட்ட எஸ்பி தலைமையில், வெளிமாவட்டப் போலீசார் உள்பட மொத்தம் 6,500-க்கும் மேற்பட்ட போலீசார் கரூர் மாவட்டம் முழுவதும் தீவிரப் பாதுகாப்புப் பணியில் ஈடுபடுத்தப்பட்டுள்ளனர். முதலமைச்சரின் ரோடுஷோ மற்றும் கார் செல்லும் வழித்தடங்கள் முழுவதும் போலீசாரின் முழுமையான கட்டுப்பாட்டிற்குள் கொண்டுவரப்பட்டுள்ளது.

Tamil Nadu CM Vijay to distribute govt. job appointment orders to kin of 32 Karur stampede victims