அமெரிக்காவின் முன்னணி தொழில்நுட்ப நிறுவனமான IBM, தனது Consulting பிரிவில் உள்ள பெரும்பாலான பணியிடங்களுக்கு H-1B விசா மற்றும் கிரீன் கார்டு ஸ்பான்சர்ஷிப் வழங்குவதை நிறுத்த முடிவு செய்துள்ளது.IBM Consulting பிரிவில் 1.5 லட்சத்துக்கும் அதிகமான ஊழியர்கள் பணியாற்றி வருகின்றனர். இந்தப் பிரிவில் அமெரிக்காவில் வேலை செய்யும் வெளிநாட்டுப் பணியாளர்களுக்கு, குறிப்பாக இந்தியர்களுக்கு, இந்த அறிவிப்பு முக்கியமானதாகப் பார்க்கப்படுகிறது.H-1B என்பது அமெரிக்க நிறுவனங்கள் வெளிநாடுகளைச் சேர்ந்த திறமையான பணியாளர்களை வேலைக்கு அமர்த்துவதற்கான விசா ஆகும். கிரீன் கார்டு மூலம் ஒருவர் அமெரிக்காவில் நிரந்தரமாக வசித்து வேலை செய்ய அனுமதி பெற முடியும்.IBM நிறுவனத்தின் இந்த முடிவால் பாதிக்கப்படும் ஊழியர்கள், அமெரிக்காவுக்கு வெளியே உள்ள IBM அலுவலகங்களுக்கு மாறுவதற்கான வாய்ப்பு அல்லது இந்த ஆண்டின் இறுதிக்குள் நிறுவனத்தை விட்டு வெளியேறும் சூழல் ஏற்படலாம் எனத் தகவல்கள் தெரிவிக்கின்றன.திறமையான பணியாளர்கள் கிடைப்பது மற்றும் வாடிக்கையாளர்களின் தேவைகள் மாறி வருவதால் இந்த முடிவு எடுக்கப்பட்டதாக IBM தெரிவித்துள்ளது.ஏற்கனவே அமெரிக்காவில் வெளிநாட்டுப் பணியாளர்களை வேலைக்கு அமர்த்துவது தொடர்பான விதிமுறைகள் கடுமையான கண்காணிப்புக்கு உள்ளாகி வருகின்றன. இந்தச் சூழலில் IBM எடுத்துள்ள முடிவு, அமெரிக்காவில் வேலை தேடும் இந்திய ஐடி ஊழியர்கள் மற்றும் H-1B விசா மூலம் பணியாற்றுபவர்களிடையே கவலையை ஏற்படுத்தியுள்ளது.ஆனால், இந்த முடிவு IBM நிறுவனத்தின் Consulting பிரிவில் உள்ள பெரும்பாலான பணியிடங்களுக்குத்தான் பொருந்தும்; நிறுவனத்தின் அனைத்து வேலைகளுக்கும் விசா ஸ்பான்சர்ஷிப் நிறுத்தப்பட்டுள்ளது என்று இதைப் புரிந்துகொள்ளக் கூடாது.
