செங்கல்பட்டு மாவட்டம் மாமல்லபுரத்தில் பல்லவ மன்னர்களின் சிற்பக்கலைக்கு அடிப்படையாகக் கொண்ட அர்ஜூனன் தபசு, ஐந்துரதம், கடற்கரை கோயில், கிருஷ்ண மண்டபம் மற்றும் பஞ்ச பாண்டவர்கள் மண்டபம் போன்ற பல சிற்பங்கள் உள்ளன. வடக்கு கிருஷ்ண மண்டபம், முழுமை பெறாத சிற்பங்களின் தொகுப்பாகும். இந்த பாரம்பரிய சிற்பங்களை யுனெஸ்கோ அங்கீகரித்துள்ளது, மேலும் இந்திய தொல்லியல்துறையினர் அவற்றைப் பாதுகாத்து பராமரிக்கின்றனர்.கடற்கரை பகுதியில் அமைந்துள்ள குடவரை கோயில் மற்றும் ஐந்துரதம் சிற்பங்கள், உப்பு காற்றின் பாதிப்பிலிருந்து காக்க, அவ்வப்போது ரசாயன பூச்சுகள் பூசப்படுகின்றன. ஒரே பாறையில் வடிவமைக்கப்பட்ட பாண்டவர் மண்டபத்தில் உள்ள குடவரை சிற்பங்கள், சுற்றுலாப் பயணிகளை அதிகமாக ஈர்க்கும் தன்மையைக் கொண்டவை. இந்நிலையில், மேலே உள்ள மண்டபத்தில் விரிசல் ஏற்பட்டுள்ளது. இந்த விரிசல் பகுதியில் மழைநீர் கசிந்து வருகிறது. இதனால், சிற்ப மண்டபத்தின் முகப்பில் உள்ள அழகான வேலைப்பாடுகளுடன் கூடிய தூண்கள் சிதிலமடையும் அபாயம் உருவாகியுள்ளது. இதற்கான முன்னெச்சரிக்கையாக, தொல்லியல்துறை சார்பில் விரிசல் பகுதியில் உள்ள தண்ணீர் கசிவை தடுப்பதற்கும், விரிசலை சீரமைக்கவும் நடவடிக்கைகள் மேற்கொள்ளப்பட்டுள்ளன. முதற்கட்டமாக, தொல்லியல்துறை அதிகாரிகள் விரிசலை ஆய்வு செய்து, சீரமைப்பு பணிகளை தொடங்கியுள்ளனர். ஆனால், கடந்த சில நாட்களாக மழை பெய்து வருவதால், இந்த பணிகளில் சற்று தாமதம் ஏற்பட்டுள்ளது. இப்பணிகள் அனைத்தும் ஆய்வு மற்றும் ஆராய்ச்சி முறையில் மேற்பார்வை செய்யப்படுவதாகவும், தொல்லியல் துறை வட்டாரங்கள் இதனை உறுதிப்படுத்தியதாகவும் தெரிவிக்கப்பட்டுள்ளது.
