அயோத்தியில் ராமர் கோயில் கும்பாபிஷேகம் வரும் ஜனவரி 22ஆம் தேதி நடைபெற உள்ள நிலையில், பக்தர்கள் மிகுந்த உற்சாகத்துடன் விழாவை எதிர்நோக்கி உள்ளனர். புதிதாக கட்டப்பட்டுள்ள விமான நிலைய முனையம், ரயில் நிலையம் உள்ளிட்ட பல்வேறு திட்டங்களுக்கு அடிக்கல் நாட்டுவதற்கும், பல்வேறு திட்டங்களை தொடக்கி வைக்கவும் பிரதமர் மோடி நாளை அயோத்தி வருகை தருகிறார்.
இதனையொட்டி, 1 முதல் 12ஆம் வகுப்பு வரையிலான அனைத்துப் பள்ளிகளும் நாளை டிசம்பர் 30 அன்று விடுமுறை என அதிகாரிகள் அறிவித்துள்ளனர்.
ராமர் கோயில் திறப்பு விழா புதிய உச்சங்களை பதிவு செய்யவும், பல ஆண்டுகளாக நாட்டில் நிலவும் ஒரே மாதிரியான முறைகளுக்கு சவால் விடும் வகையிலும் அமைக்கப்பட்டுள்ளது. நம்பிக்கையின் பயணத்தை எடுத்துக்காட்டும் வகையில், இஸ்லாமிய பெண் ஒருவர் மும்பையில் இருந்து அயோத்திக்கு நடைபயணமாக பயணம் செய்ய முடிவு செய்திருப்பது பலரையும் ஆச்சரியத்தில் ஆழ்த்தியுள்ளது.
உத்தர பிரதேசத்தில் உள்ள அயோத்தி விழாக்கோலம் பூண்டுள்ள நிலையில், ஜனவரி 22ஆம் தேதி ராமர் கோயில் திறப்பு விழாவுக்காக காங்கிரஸ் மூத்த தலைவர் சோனியா காந்திக்கு அழைப்பு வந்ததாக காங்கிரஸ் கட்சி தெரிவித்தது. இருப்பினும், அவர் விழாவில் பங்கேற்பாரா என்பது குறித்து தகுந்த நேரத்தில் முடிவு செய்யப்படும் என்று அக்கட்சி கூறியுள்ளது.
இதுகுறித்து காங்கிரஸ் பொதுச் செயலாளர் ஜெய்ராம் ரமேஷ் கூறியதாக டைம்ஸ் ஆஃப் இந்தியா வெளியிட்டுள்ள தகவலின்படி,‘ராமர் கோயில் திறப்பு விழாவுக்கு காங்கிரஸ் நாடாளுமன்றக் கட்சித் தலைவர் சோனியா காந்தி மற்றும் காங்கிரஸ் மூத்த தலைவர் மல்லிகார்ஜுன் கார்கே ஆகியோர் அழைக்கப்பட்டுள்ளனர். தகுந்த நேரத்தில் முடிவு எடுக்கப்பட்டு, உரிய நேரத்தில் தெரிவிக்கப்படும்’ என்று கூறினார்.
அயோத்தியில் பிரமாண்டமான ராம ஜென்மபூமி கோயிலுக்கு ராம் லல்லா சிலையை தேர்ந்தெடுப்பதற்கான வாக்கெடுப்பு இன்று நடைபெற்றது. இந்த முடிவு ஜனவரி 22ஆம் தேதி திட்டமிடப்பட்டுள்ள கோயிலின் கட்டுமானம் மற்றும் கும்பாபிஷேகத்தில் ஒரு முக்கிய படியாக இருக்கும்.
NDTV-யின் படி , தனித்தனி சிற்பிகளால் வடிவமைக்கப்பட்ட மூன்று தனித்துவமான வடிவமைப்புகள் தேர்வுக் குழுவின் முன் சமர்ப்பிக்கப்படும். கும்பாபிஷேகத்தின் போது அதிக வாக்குகள் பெற்ற சிலை கருவறைக்குள் நிறுவப்படும் என்று கூறப்பட்டுள்ளது.
உத்தர பிரதேச முதல்வர் யோகி ஆதித்யநாத், நாளை பிரதமர் மோடியின் வருகையை முன்னிட்டு அயோத்தி தாம் ரயில் நிலையத்திற்கு வந்து ஏற்பாடுகளை ஆய்வு செய்தார். புதிய அமிர்த பாரத் ரயில்களையும் வந்தே பாரத் ரயில்களையும் பிரதமர் மோடி கொடியசைத்து ரயில் நிலையத்தை திறந்து வைக்கிறார். மேலும் பல ரயில்வே திட்டங்களை நாட்டுக்கு அர்ப்பணிக்க உள்ளார். புதிதாக கட்டப்பட்டுள்ள அயோத்தி சர்வதேச விமான நிலையத்தையும் அவர் திறந்து வைக்கிறார்.
